الحق ينقال عن حلبة أم القيوين

[UaeRace]

السلام عليكم ورحمة الله وبركاته

أخواني الأعضاء الكرام

حبيت أحط لكم موضوع عن حلبة أم القيوين .. وهو بعنوان (( الحق ينقال ))

أنا أول شيء مب من أعضاء الحلبة ولكن متابع كل صغيرة وكبيره عن الحلبة ..

بغيت أوضح لكم شيء ..

أولاً: هاي الحلبة سواها لنا الشيخ مروان بن راشد المعلا ..الله يطول بعمره .. علشان يجمع أكبر عدد من الشباب اللي يهوون هالرياضه الحلوة .. وانه ما يسيرون يرايسون في الشوراع ويعرضون عمارهم للحوادث ولملاحقة الشرطه .. هاي نقطة ..

ثانياً: حلبة أم القيوين هي الأولى في الإمارات وما صار لها فترة وماشاء الله نشوفها تنافس الحلبات القديمه اللي في الكويت والبحرين وهاي شهادة من أهل الكويت والبحرين اللي زارونا ..

ثالثاً: لجنة التحكيم من كادر مواطن متطوع .. يعني الشباب ما يتقاضون شيء على تعبهم في الحلبة وأنمها يقضون وقت فراغهم بممارسة هالهوايه الجميله بدون أجر .. يعني لازم ما نلومهم على كل شيء وعلى التنظيم وما أعرف شوه ..

رابعاً: الحلبة بعدها نعتبرها يديده .. والشباب يتطورون شوي شوي وبعضهم ماعندهم خلفية في هالنوع من السباقات وقاعدين يكتسبون خبرات من كل مكان .. ويحاولون يوفرون لكم كل شيء زين والكل مب مقصر.

خامساً: المرافق اليديده في الحلبه تزداد يوم بعد يوم والإداره تسعى دوم لتطوير النادي بشتى الوسائل.

أخيراً : تذاكر الدخول مب غاليه وحبيت أقولكم شيء .. عرضوا على الشيخ مروان انه يزيدون من سعر تذكرة الدخول من 10 دراهم لين 15 درهم .. يعني زياده 5 دراهم فماطاع الشيخ .. هذا كله علشان الجمهور .

وفيه أشياء وايده تنقال بس لازم أعطيكم مجال للرد

تحياتي لكم

أخوكم الصغير

UaeRace

[UaeRace]

أكثر من 62 زائر للموضوع ولا حد أبدى رايه

شوه هالبرود ؟؟ :confused:

الموضوع من 3 ايام الحين

وين الأعضاء ؟؟؟؟

أتمنى اشوف تفاعل من الجميع

[caprice ss 91]

صراحه مشكور وما قصرت على هذه المعلومات القيمه ونشالله نقرا اكثر ويعطيك الف عافيه